Urzh Karl Marx

Urzh Karl Marx (alamaneg: Karl-Marx-Orden) e oa anv enor uhelañ Republik Demokratel Alamagn (RDA). Ouzhpenn ar vedalenn e veze resevet ivez ur priz a 20 000 mark eus Alamagn ar Reter. Savet e oa bet an urzh d'ar 5 a viz Mae 1953, deiz 135vet deiz-ha-bloaz ganedigezh Karl Marx ha war urzh Kuzul ministred an RDA. Gantañ e veze enoret hiniennoù, embregerezhioù, aozadurioù pe strolladoù milourien evit strivoù dreistordinal liammet ouzh an ideologiezh komunour war tachennoù sevenadurel pe ekonomikel pe milourel. Ledanaet e oa bet goude-se da dachennoù all betek bezañ implijet evit enoriñ keodedourien eus broioù estren. Gallout a raed bezañ enoret meur a wech evel ma oa bet Erich Honecker e 1969, 1972, 1977, 1982 ha 1985.